မလွတ်မြောက်ခြင်း မှတ်တမ်း (ဖေဖော်ဝါရီ ၂၊၂၀၂၄ ခုနှစ်)

WordPress Error တက်ပြီး မနည်း ပြန်ဆယ်ထားရတယ်။ ရှိသမျှ plugin / theme အကုန် uninstall လုပ်ပီး minimal ဖြစ်တယ်လို့ ခံစားရတဲ့ Independent Publisher theme ကို သုံးနေတယ်။

နိုင်ငံရေး

မနေ့က အာဏာသိမ်းမှု ၃ နှစ်ပြည့်။ Silent Strike လုပ်ကြတယ်။ တိုက်ပွဲတွေကတော့ နေရာအနှံ့မှာပဲ။ ရှမ်းမြောက်ဘက်မှာ ငြိမ်သွားပေမယ့် ရခိုင်ဘက်မှာ စခန်းသိမ်းတိုက်ပွဲတွေ ပြန်ဖြစ်နေတယ်။ တနင်္လာရီဘက်မှာ ဖြစ်တဲ့အကြောင်းလဲ ဖတ်လိုက်ရတယ်။ မြန်မာနိုင်ငံအလယ်ပိုင်းကတော့ တိုက်ပွဲ အပြင် မီးရှို့ခံရတဲ့ သတင်းတွေ ဖတ်နေရဆဲပဲ။ မြေစာပင်တွေရဲ့ နာကျည်းမှုက နှစ်ပေါင်းများစွာ ပျောက်ပျက်မှာ မဟုတ်နိုင်ဘူး။

ဗမာစစ်တပ် + သူ့လော်ဘီတွေကတော့ စစ်တပ် ဘာလုပ်လုပ် အမှန် ဆိုတဲ့ အချိုးမျိုး တသက်လုံးချိုးနေမှာပဲ။ နာကျည်းမှု နဲ့ တဖက်ကန်းအယူအဆ ဘယ်အရာက နိုင်သွားမလဲ ဆိုတော့ နှစ်ပေါင်း ၆၀ ကျော် မပြီးပြတ်သေးတဲ့ ပြည်တွင်းစစ်က အဆုံးအဖြတ်ပေးလိမ့်မယ် ထင်တယ်။ ပြည်တွင်းမှာတော့ နေရာအများစု မီးပိတ်နေပေမယ့် နေပြည်တော်မှာတော့ ၂၄ နာရီ မီးရတယ် ဆိုလားပဲ။

နည်းပညာ

ယောင်တဲ့ ရက်စွဲတွေပဲ။ DE ပိုင်းပဲ လုပ်ရမလိုလို ၊ Web Dev ပိုင်းပဲ လေ့လာရမလိုလို၊ Flutter + Dart ပိုင်းပဲ လုပ်ရတော့မလိုလို။ personal project တွေလဲ ရပ်နေတာ တစ်လလောက် ရှိတော့မယ် ထင်တယ်။ ကလေးတွေကို CS50 Python သင်ပေးနေတာတော့ ပြီးတော့မယ်။

အနာဂါတ်

ပိုအားစိုက်ဖို့ လိုနေပြီ။ အင်္ဂလိပ်စာ ပိုကောင်းအောင် ရေးတတ်၊ပြောတတ်ဖို့ လိုနေပြီ။ ကျန်းမာရေး ပိုလိုက်စားဖို့ လိုနေပြီ။ အလေလွင့်တာတွေ လျှော့ဖို့ လိုနေပြီ။

နေ့စဥ်ဘဝ

အိမ်မှာ တစ်ယောက်ထဲ ဖြစ်နေတော့ အချိန်တော့ မှန်နေတယ်။ မနက်ဆိုရင် Gym သွားတယ်။ ပြီးရင် ဟင်းချိုင့်ဆေးတယ်။ ထမင်းချက်ရမှာတော့ ပျင်းလို့ အပြင်ကနေပဲ ဝယ်စားလိုက်တယ်။ US Senate မှာ Child Safety အတွက် Tech CEOs (Facebook, X, TikTok, Discord, SnapChat) hearing နားထောင်ဖြစ်တယ်။ ဖြဲချက်ပဲ။

အင်္ဂလိပ်စာ သင်တန်း (ကြာသပတေး ၊ သောကြာ) ညပိုင်း တက်ဖြစ်တယ်။ ကနေဒါ ဝန်ကြီးချုပ် Justin Trudeau အကြောင်း စာအုပ် ညဘက် ဖတ်ဖြစ်တယ်။ ဘာလိုလိုနဲ့ တဝက်တောင် ကျိုးသွားပြီ။ စဥ်းစားစရာတွေက – ဝန်ကြီးချုပ် သားမို့ ဝန်ကြီးချုပ် ပြန်ဖြစ်သလားပဲ။ ကြီးပြင်းခဲ့ရတဲ့ ပတ်ဝန်းကျင် ကြောင့် အခြားသူတွေထက်တော့ ခေါင်းတလုံး ပိုမြင့်နေမှာပဲ။ ကမ္ဘာ့ခေါင်းဆောင်တော်တော်များများမှာ အဲဒီလိုမျိုး မျိုးဆက် လက်ခံတာ ဘယ်လောက်များများ ရှိသလဲ analysis လုပ်ကြည့်ရင် စိတ်ဝင်စားဖို့ကောင်းမယ်။ ဥပမာ – ဒေါ်အောင်ဆန်းစုကြည် ဆိုလဲ ဗိုလ်ချုပ်အောင်ဆန်း ရဲ့ ပတ်ဝန်းကျင်ကြောင့် ဒီလိုမျိုး နိုင်ငံရေးထဲကို သူကိုယ်တိုင် ဝင်လာတာ၊ လူထု က ယုံကြည်မှု၊နေရာ စတင်ပေးတာမျိုး ဆိုတော့လေ။ ဘုရင်စနစ်ရယ်လို့ မရှိပေမယ့် လူတွေအနေနဲ့က ကိုယ် ယုံကြည်ခဲ့ဖူးတဲ့ ခေါင်းဆောင်မျိုးဆက် ကို ဆက်ယုံကြည်မှုပေးသလား ဆိုတဲ့ အတွေး ဖြစ်မိတယ်။